TALA’AGA O SAMOA PRIMARY

Na fa’avaeina le Samoa Primary o se a’oga tuma’oti ile 2008. O se miti na fauao, faupo ma faataunu’uina e ala i le va’ai mamao ma le naunauta’iga o susuga i tama’ita’i pule : le Susuga ia Pa’u Fa’ana Iosefa Iakopo, le Susuga ia Anne Leauga ma le Susuga ia Sue Sua.

E 5 eka le fanua, o lo’o faatuina ai le Samoa Primary i Maugafiafia i Vailele. E tulaga ese ma maoa’e, ona o le anoanoa’i ma le mautu uma o ona atu falega e fa’atino ai a’oa’oga a le fanau (faletusi, fale komipiuta, fale tele, faleoloa, ma le tele o malae ta’alo).

O lo’o maua uma avanoa i so’o se tulaga fa’alea’oa’oga i le SPS, e amata mai i le vasega 1 e o’o atu i le vasega 8. E fa’atapula’aina le aofa’iga o tamaiti i totonu o vasega ta’itasi ina ia mausali ma mautinoa le a’oa’oina lelei o le fanau.

O Samoa Primary o se tasi o aoga mai le to’aitiiti o aoga, o lo’o mafai ona ofoina atu lenei auaunaga e ala I a matou vasega fa’asauniuni po o le vasega amata (3 – 5 tausaga).

E fa’amamafaina lava le gagana Samoa mai le vasega amata e o’o atu i le vasega 5. Ona fa’aogaina ai loa lea o gagana e lua mo le a’oa’oina o le vasega 6 aga’i i le vasega 8.